شعرلری مندیر (انتظار)

 

 انتظار

 

کی مِجالِس اِیبوهه

ای روزا نیمدرامون می اوشاها، وا نی بوهن

آدما زندونن و می زندونا ، جا ، نی بوهن

ای روزا حال و هوای کیچه ها باهاری نید

هیشکی هم به فرک او و دونه ی قناری نید

اورای آسمـونــم، یـه ذره بــارون نیــارن

مــزنم، شــو پــرکا ، سـر به بیاوون بیارن

آهمنــد آویـــدم و درد دلــم قــوم ایکنه

لنگتــم، دیـــری تو، انــدفه هیردم ایکنه

کی مجالس ایبوهه ،ایگن که تو جمه ای یای

صو مــزی تا ایــوریستم ،اینگشتم که بی یای

جمه ها بارتمونه که صووا دینشد دراریم

دلامـون مندیرته ز دیریتم   ترد ایزنیم

تو بیو، که ای روزا همه جقاو سر بالا ایدن

تو بیو همه  دارن می لیشیا غیـل ایخورن

تو که پشتینگرمی و خوت ای دونی که ایما

لک و پکی ایکنیم هم یـوکه  ا  سفر  بیا

اوسا، جخدی دلامون ری به دریا ایکشیم

اوســا، دِ  ، افتوونه بــالا و بـالا ایکشیم

هم و که مسافر قدیمی مونه یه رو ا سفر ایا

هم وکه با خس پلشتوکای خوش خور ایا

هم و که وختی ایا دنیا همس پر گل ایبو

هم و که وختی ایا سی همه مون  خویی ایخو

اوسا  ، د ،اُرچینه هامون پر ا شادی ایبو

همه ی جماهمون آوی و مهتاوی ایبو

تو بیو تن و خدا که هیجوری جور نیبوهه

دلامون هفسده و ای تش تو کور نیبوهه

هممون مندیرتیم می ای روزا مندیرتیم

تا جرنگشد ایکنه در، همه سر پی تورتیم

 

علیرضا همتی فارسانی    

   

نظر بدهید